बनावट रिपोर्ट प्रकरणी साखरवाडीत लॅब चालकला अटक, चौघांवर गुन्हा दाखल रुग्ण व इन्शुरन्स कंपन्यांची फसवणूक

 

साखरवाडी पुढारी वृत्तसेवा

साखरवाडी ता फलटण येथे बनावट लॅबोरेटरी रिपोर्ट तयार करून त्यावर खामगाव बुलढाणा येथील वैद्यकीय तज्ज्ञ डॉ. ब्रम्हानंद टाले यांच्या नावाचा व सहीचा दुरुपयोग केल्याच्या धक्कादायक प्रकरणाचा अखेर उलगडा झाला आहे. फलटण पोलिसांनी कारवाई करत धन्वंतरी लॅबोरेटरीचा चालक विशाल नाळे (DMLT) याला अटक केली असून, साखरवाडी येथील डॉ. बी. जे. राऊत, शंकर खडसे (DMLT), प्रतिभा साळुंके (DMLT) यांच्यावर गुन्हा दाखल करण्यात आला आहे संशयित म्हणून तपास सुरू आहे.

याबाबत फलटण ग्रामीण पोलीस स्थानकातून मिळालेल्या अधिक माहितीनुसार,

तक्रारदार डॉ. टाले   २००५ पासून ते धन्वंतरी पॅथॉलॉजी लॅबोरेटरी, खामगाव येथे अधिकृत चाचण्या करून अहवाल देत आहेत.अलीकडेच Bullet Health Care Services For Royal Sundaram Health Insurance Company चे प्रतिनिधींनी त्यांना काही लॅब रिपोर्ट दाखवले. हे रिपोर्ट पाहता डॉ. टाले यांच्या लक्षात आले की, त्यावर “Dr. B. T. Tale, MBBS MD Pathology, Reg. No. 87125” असे नाव व खोटी सही छापली होती. त्यांच्या खऱ्या नोंदणीचा क्रमांक मात्र 1125 असा आहे.या रिपोर्टवर विशाल नाळे (DMLT) याचे नावही छापलेले होते. तपासानंतर हे स्पष्ट झाले की, सदर रिपोर्ट खोटे तयार करून ते रुग्ण व इन्शुरन्स कंपन्यांना देण्यात आले होते. त्यामुळे केवळ रुग्णांच्या आरोग्याशी खेळ झाला नाही तर इन्शुरन्स कंपन्यांची मोठ्या प्रमाणावर फसवणूकही झाली असल्याचे तक्रारी मध्ये म्हटले आहे फलटण पोलिसांनी नाळे याला गजाआड करत पुढील तपास सुरू केला असून डॉ. बी. जे. राऊत, शंकर खडसे, प्रतिभा साळुंके यांचा प्रकरणात संशयित म्हणून तपास सुरू आहे

डॉ. टाले यांनी आपल्या तक्रारीत सर्वोच्च न्यायालयाच्या विशेष अनुमती याचिका  मध्यप्रदेश उच्च न्यायालयाच्या २००३ मधील निर्णयाचा दाखला दिला आहे. या निर्णयांनुसार पॅथॉलॉजी लॅबोरेटरीचे रिपोर्ट फक्त नोंदणीकृत पॅथॉलॉजिस्टनेच प्रमाणित करणे बंधनकारक आहे. DMLT पदविकाधारक व्यक्तींना अशी कायदेशीर परवानगी नाही. त्यामुळे या संशयतांनी केलेला प्रकार हा वैद्यकीय कायद्याचा भंग व गंभीर गुन्हा ठरतो.फलटण पोलिसांनी नाळे याला अटक करून इतर संशयितांविरुद्ध पुरावे गोळा करण्यास सुरुवात केली आहे. बनावट रिपोर्ट तयार करून रुग्णांची व कंपन्यांची फसवणूक करणाऱ्या आरोपींवर कठोर कारवाई करण्याची मागणी नागरिकांतून होत आहे.